آه من دنيا العصافير

قاعد في جنينة الحبّيب

في ايده وردة ،

مليان بالحنين

بيفكر كتير و كتير

سرحان في ست الحلوين

أحلام وردية ملونة

بيت صغير مش كبير

هي قالت " شارياك "

و هنعيش على اد الحال

متخافش موش هتقل عليك

ابتسم و باله مرتاح

و عاش شوية في انسجام

حبة و مدامش الحال

سمع بودنه صوصوه

مليانة خناق و نأورة

فهم منها على خفيف

عصفور رايح كعريس

طالبين منه عش

يكون بتاعه و تمليك

و عروسته زينة العصافير

قالت أنا زيي مفيش

مسكنش انام على قش

انا يتفرشلي العش حرير

خناقات و رغي و حواديت

آه منها دنيا العصافير!!

ضحك بصوت عالي

قال حبيبتي شارياني

و بص لفوق من تاني

" متخطب يا صوصو م البني آدمين "

عدى وقت خفيف

اصدي صغير مش طويل !!

و الأمورة العصفورة اهي وصلت

و قام لها ابو العصافير

ابتسم،،، ابتسمت

قالها بحبك و كلام تاني كتير

قالت بكسوف يا حبيبي

الشقة ايجار جديد

و الدنيا . اه منها الدنيا

مخلتش للخباز دقيق

ملحقتش تكمل كلامها

لقاها بمنقار كبير

و الريش غطاها بشكل مخيف

و اتقلب كلامها لصوصوه

و شوية و جت النأورة

بص شمال و يمين

مستناش و قال يا فكيك

و اهي مالها حياة العزوبية

دا انا عايش حياتي أمير

بلا حب بلا خيبة

بلا كلام بايخ و خنيق

.................

و سلملي على دنيا العصافير